შინაგან საქმეთა სამინისტროს საგანგებო სიტუაციების მართვის სამსახურის მეხანძრე-მაშველებმა ეროვნული გვარდიის რეზერვისტებს საგანგებო სიტუაციებზე რეაგირების პრაქტიკული და თეორიული ტრენინგი ჩაუტარეს.
პრაქტიკული სწავლება, რომელიც ტყის ხანძრებზე რეაგირების და სამთო-სამაშველო მიმართულებებს მოიცავდა, ეროვნული გვარდიის მე-20 ტერიტორიული თავდაცვის ბრიგადის სასწავლო ცენტრ „პალდოში“, ერთი კვირის განმავლობაში მიმდინარეობდა.
სწავლების დასკვნით ეტაპზე გამართულ შემაჯამებელ სიმულაციურ მოქმედებებს, საგანგებო სიტუაციების მართვის სამსახურის უფროსის მოადგილე - ზურაბ პავლიაშვილი და ეროვნული გვარდიის უფროსი - ბრიგადის გენერალი რომან ჯოხაძე დაესწრნენ.
სწავლება სისტემატურ ხასიათს ატარებს და უწყებათშორისი თანამშრომლობის გაძლიერებას, კოორდინირებული მოქმედებების დახვეწას, ასევე, სტიქიური უბედურებისა და კატასტროფების დროს საგანგებო სიტუაციებზე რეაგირების შესაძლებლობების განვითარებას ისახავს მიზნად.
