შინაგან საქმეთა სამინისტროს საგანგებო სიტუაციების მართვის სამსახურს, განსაკუთრებულ სიტუაციებზე რეაგირების მთავარი სამმართველოს ბაზაზე, საქართველოს თავდაცვის ძალების წვრთნებისა და სამხედრო განათლების სარდლობის სამეთაურო-საშტაბო კოლეჯის 60 მსმენელი ესტუმრა.
ვიზიტის მიზანი იყო სამეთაურო-საშტაბო კურსის მსმენელებისთვის საგანგებო სიტუაციების მართვის სამსახურის ფუნქციური სტრუქტურისა და ქვეყნის უსაფრთხოების სისტემაში მისი როლის გაცნობა.
ღონისძიების ფარგლებში, საჩვენებელი სწავლება რამდენიმე კუთხით განხორციელდა. სამსახურის ბაზაზე წარმოდგენილი იყო სიმულაციები ქიმიურ, ბიოლოგიურ, რადიაციულ და ბირთვულ ინციდენტებზე რეაგირების, სამთო-სამაშველო, ურბანული და მანქანის ხანძრის ქრობის მიმართულებით. გარდა ამისა, მოეწყო სამაშველო ბატუტის შესაძლებლობების დემონსტრირებაც. საჩვენებელი ღონისძიება მაშველი ძაღლის მიერ სიმულაციური სამაშველო ოპერაციის ჩატარების ჩვენებით დასრულდა.
განსაკუთრებულ სიტუაციებზე რეაგირების მთავარი სამმართველოს ბაზაზე, კოლეჯის მსმენელებმა სახანძრო-სამაშველო სპეციალური ტექნიკისა და აღჭურვილობის გამოფენაც დაათვალიერეს, რომელიც სპეცილურად აღნიშნული ღონისძიებისთვის მოეწყო.
